گل پژمردہ

کس زباں سے اے گلِ پژمردہ تجھ کو گل کہوں

کس طرح تجھ کو تمنّائے دلِ بلبل کہوں

تھی کبھی موجِ صبا گہوارۂ جنباں ترا

نام تھا صحنِ گلستاں میں گلِ خنداں ترا

تیرے احساں کا نسیمِ صبح کو اقرار تھا

باغ تیرے دم سے گویا طبلۂ عطّار تھا

تجھ پہ برساتا ہے شبنم دیدۂ گریاں مرا

ہے نہاں تیری اداسی میں دلِ ویراں مرا

میری بربادی کی ہے چھوٹی سی اک تصویر تو

خواب میری زندگی تھی جس کی ہے تعبیر تو

ہمچو نَے از نیستانِ خود حکایت می کنم

بشنو اے گُل! از جدائی ہا شکایت می کنم